Ein måtte ikkje flytte eller halde bryllaup på ein fredag. Det følgde inga lykke med «fredagsbrur». Og ein måtte slett ikkje flytte eller gifte seg i adventa, for i adventa skal det vera stilt. Ho Guri fortel om dette: «Da eg var gift i 1905, skulle eg flytte til Orkdalen i adventa. Da kom ho Gammel-Marit Dalo eins ærend på Lian og bad meg ikkje å flytte på denne tid. «Æ vil dæ berre vel», sa ho. «Kjære de, hør på me. Æ ha sett mang' så ha fløtta, og de ha alder følgt løkk' me adventfløttinga.» Same dagen vart det slikt fælt uver, og det varte i mange dagar. Så vi kom ikkje over fjellet før i januar. Så ho fekk viljen sin, ho Marit.